राजविराज, २३ असार-सप्तकोशी नदीमा लगातार बहाव बढ्दै गएको छ । अविरल वर्षासँगै सप्तकोशी नदीमा शनिबार विहान बाढी आएको थियो ।
अझ पहाडी क्षेत्रमा लगातार भइरहेको वर्षाले नदीमा बाढी बढ्ने क्रम जारी रहेको छ । आइतबार विहान ८ बजे कोशी ब्यारेजमा गरिएको मापनअनुसार ३ लाख ४२ हजार ५२० क्युसेकका दरले पानीको वहाव रहेको ब्यारेजस्थित नियन्त्रण कक्षले जनाएको छ ।
यसअघि शनिबार साँझ २ लाख ८२ हजार क्युसेक पानीको वहाव रहेकोमा राति १० बजे भने ३ लाख १५ हजार क्युसेक बहाव पुगेको थियो । त्यस्तै शनिबार दिउँसो १ बजेको मापनअनुसार कोशीको वहाव २ लाख ४४ हजार थियो भने शुक्रबार १ लाख क्युसेक मात्रै थियो ।
वहाव बढ्दो देखिएसॅंगै आइतबार विहान ब्यारेजमा कुल ५६ वटा ढोकामध्ये ४६ वटा ढोका खोलिएको जनाएको छ ।
