राजविराज, १० असोज-सप्तरीको हनुमाननगर कंकालिनी नगरपालिका-१ ब्यारेजस्थित कोशी नदीमा खसेको बसमा सवार १७ जनाकै सकुशल उद्धार गरिएको छ ।
विहीबार साँझ विराटनगरबाट गाईघाटतर्फ जादै गरेको को.१ ख.४६०१ नम्वरको बस अनियन्त्रित भएर ३५ नम्वरको ढोकादेखि दक्षिणतर्फ नदीमा खसेको थियो ।
स्थानीयसॅंगको सहयोगमा बसमा सवार १७ जनाकै सकुशल उद्धार गर्न सफल भएको प्रहरी नायब उपरीक्षक ढुण्डीराज नेउपानेले बताए ।
उनका अनुसार उक्त बसमा चालक, सह-चालक र यात्रुसहित १७ जना सवार थिए । बसका चालक सिरहाको लहान नगरपालिका-८ बस्ने ३५ वर्षीय चन्दनकुमार मेहतालाई नियन्त्रणमा लिईएको छ भने उद्धार गरिएकाहरुलाई उपचारको लागि विभिन्न अस्पताल पठाईएको प्रहरी नायब उपरीक्षक नेउपानेले जानकारी दिए ।
