सर्लाही, ३ साउन । सर्लाहीको बरहथवा नगरपालिका अन्तर्गत इलाका प्रहरी कार्यालय हिरापुरका इन्चार्ज प्रहरी नायब निरीक्षक (सई) बैद्यनाथ दास तस्करीसँग सम्बन्धित एक अडियो सार्वजनिक भएपछि निलम्बनमा परेका छन्। अडियोमा सई दासले एक तस्करसँग १८ हजार रुपैयाँको माग गर्दै मोलमोलाइ गरिरहेको आवाज सुन्न सकिन्छ।
सई दास विगत आठ महिनादेखि हिरापुर प्रहरी कार्यालयको इन्चार्जका रूपमा कार्यरत थिए। तर अडियो सार्वजनिक भएपछि उनलाई तत्कालै जिम्मेवारीमुक्त गर्दै इलाका प्रहरी कार्यालय बरहथवामा झिकाइएको छ। जिल्ला प्रहरी कार्यालय सर्लाहीका सूचना अधिकारी तथा प्रहरी नायब उपरीक्षक (डीएसपी) सरोज राईका अनुसार अडियोको सत्यता र घटनाको विस्तृत विवरणबारे थप अनुसन्धान भइरहेको छ।
सई दासको स्थानमा हिरापुरमा नयाँ इन्चार्ज पठाउने तयारी भइरहेको पनि डिएसपी राईले जानकारी दिए। सार्वजनिक अडियोमा स्पष्ट रूपमा सुनिन्छ कि सई दास तस्करीमा सहयोग गर्ने सर्तमा आर्थिक लाभ मागिरहेका छन्, जुन प्रहरी मर्यादा र आचरणविपरीत हो।
यसबाहेक, बैद्यनाथ दास यसअघि पर्सा जिल्लामा कार्यरत रहँदा पनि अनुशासनहीन कार्यका कारण निलम्बनमा परेका थिए। पुनः यस्तो कार्यमा मुछिएपछि उनलाई कारबाहीको दायरामा ल्याइएको हो।घटना सार्वजनिक भएपछि प्रहरी संगठनको शुद्धीकरण र पारदर्शितामा पुनः प्रश्न उठेको छ।
