राजविराज, २३ माघ । सप्तरीको कञ्चनरुप नगरपालिका–४ स्थित नापी कार्यालय कञ्चनपुरका निमित्त कार्यालय प्रमुख र लेखापढी व्यवसायी घुस रकमसहित शुक्रवार रङ्गेहात पक्राउ परेका छन् ।
अख्तियार दुरुपयोग अनुसन्धान आयोगको कार्यालय इटहरीबाट खटिएको टोलीले निमित्त कार्यालय प्रमुख सर्वेक्षक हरिचन्दर ठाकुर र लेखापढी व्यवसायी अरुणकुमार यादवलाई घुस रकमसहित रङ्गेहात पक्राउ गरेको हो ।
जग्गाको कित्ता काट गरी दिने भनी सेवाग्राहीसँग १५ हजार रुपैयाँ घुस रकम माग गरेको भन्दै आयोगमा परेको निवेदनको अनुसार खटिएको टोलीले चिया पसलमा रकम लिदै गर्दा नियन्त्रणमा लिएको आयोगका प्रवक्ता नारायण प्रसाद रिसालले बताए । दुवै जनामाथि थप अनुसन्धान भइरहेको जनाएको छ ।
