खडक नगरपालिकाः औषधी खरिदमा पनि लापरवाही

राजविराज, २७ भदौ । सप्तरीको खडक नगरपालिकामा जनस्वास्थ्यसँग जोडिएको औषधी खरिदमा पनि लापरवाही गरेको पाइएको छ ।

महालेखा परीक्षकको कार्यालयले सार्वजनिक गरेको तथ्यांकअनुसार नगरपालिकाले ३५ लाखभन्दा बढी रुपैयाँ बराबरको औषधी खरिदमा लापरवाही गरेको पाइएको हो ।

सार्वजनिक खरिद नियमावली २०६४ को नियम ८५ को उपनियम १(क)अनुसार २० लाख रुपैयाँसम्मको औधषीजन्य मालसमान उत्पादकले राष्ट्रियस्तरको समाचार पत्रमा सूचना प्रकाशन गरी तोकेको विक्री मूल्यमा खरिद गर्नुपर्ने व्यवस्था छ । तर, नगरपालिकाले भने सो प्रक्रिया विना नै आर्थिक वर्ष ०७६/०७७ मा ३५ लाख ३५ हजार ७७१ मूल्य बराबरको औषधी खरिद गरेको प्रतिवेदनमा उल्लेख छ ।

खरिद भएका औषधीहरु कुन कम्पनीबाट उत्पादित हो र सो बारे राष्ट्रिय पत्रपत्रिकामा प्रकाशन भएको समेत देखिएको छैन् भने औषधी आपूर्ति गर्दा विश्व स्वास्थ्य संगठन (डब्लुएचओ)बाट सर्टिफाइड हुनुपर्ने औधषीको उत्पादन मिति, ब्याच नम्बर र म्याद समाप्त मिति उल्लेख गरी सम्बन्धित विषय विज्ञबाट मुचुल्का उठाएर नराख्ने गरेको तथा सो औषधी विक्रीको लागि नरहेको खुल्ने प्रमाण पेश नभएको प्रतिवेदनमा छ ।

प्रतिवेदनमा खरिद गरिएका सो औषधीहरु तोकिएकै गुणस्तर अनुसार प्राप्त भए नभएको कुरा यकिन गर्न समेत ध्यानाकर्षण गराइएको छ ।

यता, नगरपालिकाका स्वास्थ्य शाखा प्रमुख जयकान्त पण्डितले सो बारे आफुलाई जानकारी समय लाग्ने बताए । ‘टेण्डर भएको होला, यद्यपी के रैछ बुझ्छु’, उनले भने ।

Author:

क्याटोगरी छान्‍नुहोस