राजविराज – पूर्व पश्चिम राजमार्ग अन्तर्गत सप्तरीको खडक नगरपालिका–७ कल्याणपुर बजारमा मोटरसाइल दुर्घटना हुँदा छोरीको मृत्यु भएको छ भने बुवा घाइते भएका छन् ।
पश्चिमतर्फ जादै गरेको को १५ प १९१ नम्वरको मोटरसाइकललाई विपरित दिशाबाट आउँदै गरेको बा ३ च ५२९३ नम्वरको कारले आइतवार ठक्कर दिएपछि दुर्घटना भएको हो । दुर्घटनामा उदयपुरको त्रियुगा नगरपालिका–९ बगाहा टोलकी १० वर्षीया एञ्जिला बस्नेतको मृत्यु भएको प्रहरी नायव उपरीक्षक नरेशकुमार सिंहले जानकारी दिए ।
उनका अनुसार घाइते एञ्जिलाको छिन्नमस्ता अस्पताल, राजविराजमा उपचारका क्रममा मृत्यु भएको हो । मोटरसाइकल चालक मृतकका बुवा ३६ वर्षीय ध्रुव बस्नेत घाइते भएका छन्। घाइते ध्रुवको उपचार भइरहेको छ।
ईलाका प्रहरी कार्यालय कल्याणपुरले कारका चालकलाई नियन्त्रणमा लिएको जनाएको छ।
