निता थापा
हिजोसम्म सडकमा टायर बाल्ने र “यो सरकारले केही गरेन” भन्दै घाँटीका नसा फुलाएर कराउने ती जोशिला हातहरू आज सिंहदरबारको घुम्ने कुर्सी मिलाउन व्यस्त छन्। कस्तो अचम्मको ‘ट्रान्सफर्मेसन’!
१. “प्रश्न” बाट “उत्तर” तिरको यात्रा
हिजोसम्म संसद्मा प्रश्न सोध्दा सोध्दै माइकै भाँचिएला जस्तो गर्ने नयाँ नेताज्यूहरूलाई आज अलिअलि उत्तर दिँदा पनि पसिना छुट्न थालेछ। विपक्षीमा हुँदा “अहिलेको अहिल्यै समाधान चाहिन्छ” भन्ने सोसल मिडियाका पोस्टहरू आज “प्रक्रिया पुर्याउँदै छौँ” भन्ने सरकारी भाष्यमा परिणत भएका छन्।
२. फेसबुकको ‘रिभोलुसन’ र मन्त्रालयको ‘फाइल’
सडकमा हुँदा फेसबुक लाइभमा आउने बित्तिकै हजारौँ ‘लिरिङ’ (Reaction) आउँथे, तर आज मन्त्रालयको एउटा फाइलमा तोक लगाउनुपर्दा आफ्नै ‘रियाक्सन’ फेरिएको छ। नयाँ जोश, नयाँ होस भन्थे तर सत्ताको कुर्सीले सायद अलि बढी नै “होस” दिलाइदिएछ कि?
३. भाषण र रासनको अन्तर
हिजो सडकको धुलोमा बसेर “जनताको रासन” को कुरा गर्दा जति मज्जा आउँथ्यो, आज सत्ताको चिल्लो गाडीमा बसेर “बजेटको भाषण” सुन्दा त्यति नै निद्रा लाग्न थालेको जस्तो देखिन्छ। विपक्षीमा बस्दा सरकार “अन्धो” देखिन्थ्यो, आज आफू सरकारमा बस्दा जनता “अलि बढी नै हतारिएका” देखिन थालेछन्।
४. चस्मा फेरियो कि नजर?
नयाँ नेताहरू भन्थे— “हामी आउने बित्तिकै जादु गर्छौँ।” तर अहिले जादु होइन, केवल ‘जबाफ’ दिने तरिका फेरिएको छ। हिजो औँला ठड्याएर जबाफ माग्नेहरू आज फाइलले मुख छोपेर जबाफ दिनुपर्दाको “मज्जा” नै छुट्टै होला नि, होइन र?
सारमा:
विपक्षीमा हुँदा सबै समस्याका समाधान गोजीमै छन् जस्तो लाग्छ, तर जब सत्ताको तातो कुर्सीमा बसिन्छ, तब मात्र थाहा हुन्छ— “चिच्याउनु र चलाउनु” मा कति ठुलो खाडल छ! नयाँ नेताज्यूहरूलाई कुर्सीको यो ‘मज्जा’ र जनताको ‘जगाम’ दुवैले अलि धेरै नै सिकाओस्। source: facebook
