जनकपुर, १२ असार । नेपालमा पछिल्लो २४ घण्टामा २ हजार १६ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार विभिन्न जिल्लामा गरिएको ४ हजार ७०४ पीसीआर परीक्षणमा १ हजार १७४ जनामा कोरोना पुष्टि भएको छ भने ४ हजार ८०६ एन्टिजेन परीक्षणमा ८४२ जनामा कोरोना संक्रमण देखिएको छ ।
योसँगै नेपालमा पीसीआर परीक्षणमा कोरोना देखिनेको संख्या ६ लाख ३२ हजार ३२६ पुगेको छ । यसैगरी ४ हजार ९१४ जना कोरोना संक्रमणमुक्त भएका छन् । योसँगै हालसम्म निको हुनेको संख्या ५ लाख ८१ हजार ३२७ पुगेको छ । कुल संक्रमितका आधारमा निको हुनेको दर ९१ दशमलव ९ प्रतिशत रहेको छ ।
यसैगरी संक्रमणबाट थप ३० जनाको मृत्यु भएको छ । योसँगै नेपालमा कोरोनाबाट मृत्यु हुनेको संख्या ८ हजार ९७५ पुगेको छ । संक्रिय संक्रमितको संख्या ४२ हजार २४ रहेको छ भने क्वारेन्टाइनमा ३६१ जना छन् ।
