काठमाडौं । राष्ट्रिय प्रजातन्त्र पार्टीको पदाधिकारी बैठक आज बस्दैछ । निर्वाचन आयोगले राप्रपाको विधान र झण्डा सच्याउन निर्देशन दिएपछि राप्रपा अध्यक्ष राजेन्द्र लिङदेनले पदाधिकारी बैठक बोलाएका हुन् ।
१ बजेपछि राप्रपा केन्द्रीय कार्यालयमा बस्ने बैठकमा निर्वाचन आयोगको पत्र, राष्ट्रिय सभा निर्वाचन लगायतका विषयमा छलफल हुने बताइएको छ । राप्रपा केन्द्रीय सदस्य मोहन श्रेष्ठले निर्वाचन आयोगले विधानबाट राजसंस्था, हिन्दूराष्ट्र लगायतका शब्द हटाउन तथा झण्डा परिमार्जन गर्न पत्र काटेको बारे बैठकमा छलफल हुने बताए ।
आयोगमा दलको विवरण अद्यावधिक गर्दा यसअघि पनि त्यसखालका पत्रहरु आउने गरेको श्रेष्ठले बताए । ‘आयोगले दललाई पत्र लेख्नु सामान्य हो । पहिले पनि यस्ता पत्र धेरै आएका छन् । यद्यपि यसबारे पार्टीमा छलफल हुन्छ’, श्रेष्ठले भने ।
राप्रपाले ‘संवैधानिक राजसंस्थासहितको हिन्दू राष्ट्र नेपाल’ को पक्षमा वकालत गर्दै आएको छ । राप्रपाका केही नेताहरुले आयोगको निर्णयप्रति सार्वजनिक प्रतिक्रिया दिदैं आपत्ति जनाइसकेका छन् । आजको बैठकमा माघ १२ गते हुने राष्ट्रियसभा निर्वाचनबारे पनि छलफल हुने बताइएको छ ।
