राजविराज, २२ असोज । सप्तरीमा कोरोना संक्रमित थप एक वृद्धको विहिवार मृत्यु भएको छ । उपचारकोलागि धरानतर्फ पठाउने क्रममा ६७ वर्षीय वृद्धको मृत्यु भएको राजविराज नगरपालिकाका मेयर शम्भुप्रसाद यादवले जानकारी दिए ।
४–५ दिनअघि ज्वरो आएपछि उनी गजेन्द्रनारायण सिंह अस्पताल राजविराजमा भर्ना भएका थिए । सोही क्रममा बुधवार उनमा संक्रमण देखिएपछि होम आइसोलेसन पुगेका थिए । होम आइसोलेसनमा उनको स्वास्थ्य अवस्था गम्भीर भएपछि उपचारकोलागि लगिने क्रममा मृत्यु भएको हो ।
मृतक निमोनियाले ग्रसित रहेको मेयर यादवले बताए । डाकनेश्वरी नगरपालिका–४ निवासी उनी हाल राजविराज नगरपालिका–६ मा बस्दै आएका थिए ।
योसँगै सप्तरीमा कोरोनाबाट मृत्यु हुनेको संख्या १८ जना पुगेको स्वास्थ्य कार्यालय सप्तरीका निमित्त प्रमुख दुनीयालाल यादवले जानकारी दिए । उनका अनुसार हालसम्म सप्तरीमा १३ सय ५७ जनामा कोरोना संक्रमण देखिएको छ ।
संक्रमितमध्ये १ हजार ९६ निको भएर घर फर्किएका छन् । यसैगरी २४३ सक्रिय संक्रमित रहेको स्वास्थ्य कार्यालयले जनाएको छ ।
