सिरहा- धनुषा जोड्ने कमला पुलको अर्को पिलर पनि भासियो

जनकपुरधाम । हुलाकी राजमार्ग अन्तर्गत सिरहा- धनुषा जोड्ने कमला नदीमा निर्माणाधिन पुलको अर्को पिलर (स्पान) पनि भासिएको छ । नदीमा आएको बाढीका कारण बुधवार पुलको अर्को पिलर पनि भासेको हो ।

धनुषा जिल्लातर्फको ३ नम्बर पिलर भासिएको धनुषाका प्रमुख जिल्ला अधिकारी बन्दु प्रसाद बास्तोलाले पुष्टि गरे । पिलर भासिएको सूचना आएपछि कमला सिंचाई आयोजना र सुरक्षाकर्मीलाई निरीक्षण गर्न पठाएको उनले जानकारी दिए ।

पुल निर्माणको काम सकिनै लाग्दा गत असार १७ मा नदीमा आएको बाढीका कारण तीन वटा पिलर भासिएको थियो ।

पप्पु-लुम्बिनी जेभीले पुल निर्माणका लागि २०६८ सालमै करिब २५ करोडमा ठेक्का लिएको थियो । तीन वर्षमै निर्माण गर्नुपर्ने सो पुल सात वर्षसम्म २५ प्रतिशत काम मात्र गरे । पछि घाटा लाग्ने अबस्था आएपछि पप्पुले हात झिक्यो ।

पप्पुले काम छाडेपछि लुम्बिनी बिल्डर्सले बाँकी काम गर्ने सम्झौता गरे । तर फिनिसिंगको काम गरी उद्घाटनको तरखरमा रहेको बेला परेको अविरल वर्षापछि आएको बाढीले पिलर भासिएको थियो ।

सरकारले भासिएको पिलर पुनर्निर्माण गर्न निर्देशन दिएको बेला पुनस् अर्को पिलर भासिएको छ । सम्झौता अनुसार पिलर नगाडेका कारण भासिएकोले अब नयाँ तरिकाले पुन पुल निर्माण गर्नुपर्ने स्थानीयको माग छ ।

Author:

क्याटोगरी छान्‍नुहोस